Ons Boere Se Trotse Geskiedenis

 

 

Boere Stories, Staaltjies en Kommando's

 


Nog 'n Vryheidsoorlog-storie.

My vader was 'n Kaapse rebel, en 'n penkop van sowat vyftien jaar
in die Tweede Vryheidsoorlog. Die penkoppe het verskeie onnutsige
dinge aangevang. Daar was een gebeurtenis wat Pa sy hele lewe lank
onthou het.

Die kommando het 'n Britse koskonvooi voorgelê en die soldate wat
die waens moes oppas, gevange geneem. Marthinus word aangesê om 'n
middeljarige Britse soldaat op te pas.
Dié gaan sit daar eenkant teen 'n miershoop, baie nukkerig dat 'n
seun hom moes oppas. Dit was toe dat Marthinus besluit dat hy darem
met meer gesag sy taak moes verrig. Hy haal sy laphoedjie van sy kop
af, vat die soldaat se helm en plaas dit op sy kop, terwyl hy sy
laphoedjie op die soldaat se kop sit.

Na 'n ruk brom die soldaat so onderlangs en al wat Marthinus kon
uitmaak, was die woord hungry. Die konvooi het mos kos en die
burgers was besig om die voorraad uit te pak. Marthinus het toe 'n
groot tienpond-blik boeliebief nader gesleep, en dit voor die Tommie
met 'n byl oopgekap. Met 'n groot stem het hy toe gesê: ``Eat''. Vir
die Tommie was dit so snaaks dat hy begin lag het.

 

Ons Boere Se Trotse Geskiedenis

 

 

Boere Stories, Staaltjies en Gedigte